ئه‌ز دێ مرم ، كوردستان نامريت/ ترس ژ كوردان دترسيت !

كوفارا دةنكى شيخان

ده‌مێ  هويرهزر د په‌يڤا شه‌هيد( ئه‌رجان مارى) دا بكه‌ين كو ئه‌ڤى قه‌هره‌مانى شه‌ڤا پێش سێداره‌دانێ نڤيسيبوو ( دايێ سۆبه‌ زوى من وخلفا سێدارێ ژڤانه‌ ، ئه‌ز د

مرم كوردستان نامريـت) فه‌لسه‌فه‌كا مه‌زن بۆ ژيانێ د ڕوانگه‌ها هزرى يا كوردان تێدا خۆيا دبيت ، ب كويراتييا ده‌ريايان واتاى دبه‌خشيته‌ ژيانێ ، هه‌ر چه‌ند دۆژمنان رۆژێن روون لێ تاريكربوون..به‌لێ كوڕێن زاگرۆسى چ جاران خۆ ڕاده‌ستى تارياتييێ نه‌كرن و نه‌كرينه‌ ژ به‌ر كو ئه‌و ب خۆ كوڕين رۆژێنه‌. كوڕين ئاسويێن گه‌شن.د فه‌لسه‌فا كورده‌واريدا ( ترس ژ كوردان دترسيت )..يان وه‌ك ئه‌و ميناكا به‌ربه‌لاڤ ل سه‌ر كوردان كو دبێژيت ( كورد ژ برس و تێهناتييێ دێ مريت به‌س كورد چ جاران ژ ترسێ نامريت) پرسيار ل ڤێره‌ بو هه‌ر خۆدان هزركى چێدبيت كو بووچ ترس ل جه‌م كوردان چ واتا نينه‌؟!!

په‌يداكرنا به‌ر‌سڤا ڤێ پرسياره‌ دناڤ ژين و ژيانا كوردان و چاره‌نڤيسێ وان يێ بووريدا ڤه‌شارتييه‌ كو ئه‌گه‌ر پاشڤه‌گه‌ڕه‌كێ بكه‌ين بۆ ڤێ چه‌ندێ و سايكۆلۆژى وژينگه‌ها تاكێ كورد بێخينه‌ به‌رچاڤ ، دێ به‌رسڤا خۆبينين ، هه‌ر چه‌ند ئه‌ڤ ته‌وه‌ره‌ مه‌يدانى و به‌رفرهه‌ و ب چه‌ند خاله‌كان نكارين ب ڕه‌نگه‌كێ ئاكاديمى مافێ وێ ببه‌خشين لێ دێ ئاماژێ ده‌ينه‌ چه‌ند خاله‌كان.

ده‌مێ بزڤڕين بو سه‌ر ده‌مێن دێرين يێن مێژووى. ملله‌تێ كورد ل سه‌ر هه‌مى تشتان بوويه‌ قوربانى ژ هويرترين تشت تا كو گرترين و گرنگترين تشت وه‌سا خويايه‌ خوينا كوردان ل جه‌م چاركنارێن وان حلال بوويه‌!..سه‌را ئاخا خوقوربانى بووينه‌..سه‌را كۆلتورێ خۆقوربانى بووينه‌ سه‌را شه‌ره‌ف ونامووسێ هه‌ر وه‌سا..ئه‌گه‌ر بچووكترين گازنده‌‌ ژى كربان دا هه‌ر بنه‌ قۆچى قوربانى بوو ره‌گه‌زپه‌ره‌ست و شۆڤينيێن ره‌خ وچانا و ئاخا وان ببوو جهێ تاخت وتازێن هه‌سپ و شوين پيێن نه‌يارا..ئه‌ڤ ديارده‌ هه‌ر ژ ده‌مێ په‌يڤا كاردۆخ و كاردۆك ده‌ركه‌ڤتى و بوويه‌ كورد هه‌ر ئه‌ڤ تاسه‌ و ئه‌و حه‌مام ل سه‌رده‌مێ كو بووينه‌ موسلمان ژى لێ هه‌ر كافر دهاتنه‌ ناڤكرن و كوشتنا وان حلال دكرن!!. و ل ژێر ناڤێ په‌يڤێن قورئانا پيرۆز ژى وه‌ك ئه‌نفال هه‌ر دهاتنه‌ كۆمكۆژكرن!!!.له‌وما ژ لايێ زانستيڤه‌ ئه‌گه‌ر ئازار ل سه‌ر جه‌سته‌يێ كه‌سه‌كيدا ژ ڕاده‌ى ده‌ربازبوو ئێدى هه‌ست ب ئازارێ ناكه‌ت…ده‌مێ كوشتن ل سه‌ر ملله‌ته‌كى ژ ڕاده‌ى ده‌ربازبوو ئێدى ترس ژ مرن وكوشتنێ ل جه‌م نامينيت..چونكه‌ ئێدى ب چاڤێ تشته‌كێ نامۆ به‌رێ خۆ ناده‌نه‌ ڤێ دياردێ..ب پێچه‌وانه‌ ل جه‌م وان دبيته‌ تشته‌كێ زۆر ئاسايى..له‌وما ده‌مێ دبيته‌ ئاسايى ل وى ده‌مى سه‌رێ خو ناچه‌مينن د به‌رامبه‌ر زولم و سته‌مێ و چۆكى نادانان بو مسته‌كا خوينێ! مێژووا كوردان چ جار ژ ڤێ چه‌ندێ ڤه‌ده‌ر نه‌بوويه‌ سه‌ره‌ڕاى ڤێ چه‌ندێ ژى هه‌ر ده‌م ڕه‌شبين نه‌بووينه‌ و هه‌ر چاڤه‌ رێ ئاسۆيه‌كێ گه‌ش دكه‌ن وگه‌شيبن بووينه‌